Marka aad maqasho xerada Xalane waxaa kugu soo dhacaya halyeeygii Soomaaliyeed Maxamed Cabdulle Xalane oo isaga loo magac darray xeradan isu beddeshay dowladda ku dhex-taalla caasimadda ummadda dalka Soomaaliya ee Muqdisho.
Xalane
wuxuu u dhintay difaaca calanka iyo sharafta ummadda Soomaaliyeed, balse xerada
loo magac darray waxay noqotay mid dishay magaca iyo sharafta ummadda
Sooomaaliyeed.
Waxaa
xerada ku sugan ciidamo shisheeye, aysana wax amar iyo tallo ah ku lahayn dowladda Soomaaliya, sidoo kale
waxaa xerada Xalane ka furan xafiisyo, saldhigyo boolis, cusbitaalo, hudheelo
iyo ganacsiyo aan ruqsad ka haysan dowladda Soomaaliya.
Looma
oggola xerada ciidanka Soomaaliya, madaxda Soomaaliduna ma geli karto amar la’aan.
Dadka
Muqdisho waxay u yaqanniin xerada Xalane qabri, qof galayna ma aaminsana inuu
soo noqonaayo. ‘
Intaas
waxaa dheer in xerada ay ku sugan yihiin masuuliyiinta ciidanka Amisom, ciidamo
ka kala socda dalal kala duwan oo kuwa reer galbeedka ah iyo madaxda beesha caalamka ee kharbudka iyo
qashqashaada ka woda dalka Soomaaliya.
Dalka
Soomaaliya wuxuu xoriyaddiisa qaatay 1960, balse waxaad moodda inaysan xorriyadii
ka jirin xerada Xalane.
Sidee u
dhihi karnaa xoriyad ayaa ka jirta Xalane iyadoo aan loo oggolayn askarta
dowladda Soomaaliya, madaxda Soomaalida amar la’aan aysan geli karin, shaqaale
Soomaaliyeedna uusan ka shaqeyn marka laga reebbo calooshood u shaqaystayaal dalalka
galbeedka laga keensaday.
Xoriyaddu
waa inuu qofku ka xoroobo
wax kasta oo garbaduub ku ah awoodda aadanaha iyo wax-soosaarkiisa jireed iyo
maskaxeed labadaba, waxaa soo galaya inuu qofku iska rogo heeryada gumaysiga ,
meeshana uu ka saaro cadaadiska dusha ka saaran iyo Sandulleynta uu ku jiro, si
uu u dareemo neecowda xoriyadda.
Waxaad
moodda in dadka Soomaaliyeed ku jiraan gumaysi, balse aysan ogeyn taasi ama ay
u muuqan.
Tusaale
waxaan u soo qaadan karnaa waxaa ka socda xerada Xalane oo ay madaxda
Soomaalidu ogyihiin waxaa ka socda balse cabsi kursi iyo sandulleyn shisheeye
ay uga amuusan yihiin dhibaatooyinka halkaa ka jira.
Maxaa
lagu qabtaa Xalane?
Yaa canshuurta
ka qaada xurumaha ka furan?
Ciidanka
Soomaaliyeed maxaa loogu diidday ilaalinta iyo ka war qabka waxaa halkaa ka
socda?
Shaqaale
Soomaaliyeed maxaa diidday inay ka shaqeeyaan xerada?
0 Comments