Xukuumaddaha Saqda-dhexe.

"Xalal maalin ayaa laquutaa" weedhan hadii ay dhagaaha horey uga dhaadhacdey;

sidaa darteedna Xalal –miirad aad tahay, waxa aad u baahantahay in aad maanka galiso, luuq-luuqyada siyaasadda xaraanta iyo xalaasha hadba qiimohooda waxa uu dhanyahay inta ay hubanti ka dhigi karaan danaha daahsoon ee Caalamka Siyaasadda.

Badanaa xukuumadahii soo maray dalka mudadii dawlad la'aanta, waxa ay guud ahaan ka mideysnaayeen, hanaanka Magac-uyaalimo ee ka maran milgaha dhabta ah ee Hay'adnimo, markii lagu qiimeeyo heerka adeega ee ay u hayso bulshada iyo dalka guud ahaan; sumcadda musasadda iyo suurta galnimada in ay sal-dhigato mustaqbalka.

Runtii, in kasta oo ay jiraan caqabado badan oo horyaalo shaqo-gudashada iyo taaba-galka Waaxaha kala duwan ee dowladda, hadana waxaa la oran karaa waxa anan jirin ogaal iyo qorshe istiraatiji ah oo ay u dajiyeen dadka gacanta ku haya.

Hayeeshe markii laga yimaado qiimeynta ku aadan heerka shaqa-gudashada amba guud ahaan nuxurka hay'adnimo, waxaa u dheer cimri deg-deg ku yimaado sii-jiritaanka Hay'adahan, taas oo ay inta badan sabab u tahay is-maandhafka aan loo meeldayin ee u dhexeeya dhinacyada siyaasadda Somaliya.

Si kastaba ha ahaatee, waayadan danbe waxaa ku soo kordhay goobta tab-cusub oo ay la soo ifbaxday siyaasadda dalka , taas oo ay dad badan is weydiiyeen sababta dhabta ah ee ka danbeyso; Hadaba "Xukuumadda Seqda-dhexe" lagu dhawaaqo ayaa noqotay arrin kaftan iyo maad ka dhex-dhalisay bulshada.

Dad badan waxa ay rumeysan yihiin in arrintanu ay tahay taatiko lagu seero jiniga kooxda "Dhiiga-cusub" ee majaraha u haya siyaasadda dalka kuwaas oo inta badan habeynkii aan il iyo baal isa-saarin,

Halka kuwa kale ay u arkaan in ay tahay taatiko loogu magac daray "Ninkii Seexdo Sicii Dibi Dhal" oo looga goleeyahay, in xukuumadda ladhiso saq-dhexe, kadib markii la hubsado in ay hurdo lac-dhaheen, rag laga balan qaaday in loo magacaabo jago, si booskooda loogu bedelo rag ay gacan-saar leeyihiin dhinacyada ku gorgortamaya siyaasadda dalka (Ra'iisal wasarayaasha & Madaxweynaha).

Raisalwasaarihii xilka baneeyay MD.C/wali Sh Axmed ayaa il-furay arrintan,markii lagu waa bariistay xukuumad dhalatay saqdii dhexe ee habyenimo, waxaa sidoo kale raad-raacay ninka uga danbeeyay xilka xafiiska, Raisalwasaraha hadda jira MD. CCC Sharmaarke, markii sidoo kale uu dhisay saq-dhexe xukuumaddii dhicisoowday, isla sidoo kalena hadda ayuu mar labaad cishaha dabadii soo dhisay xukuumadiisa cusub.

Ugu danbeyn; ujeed waliba hayeesho xiliga dhismaha xumadduye, waxa ay muhiimadu tahay in aysan noqon xukuumadahani kuwa hidda raaca xilga ladhisay oo ah xilli hurdo; waa in ay u guntadaan sidii ay ugu hawl-gali lahaayeen maalin cusub oo u dhalata Soomaaliya.

By/Adam Hussein